ދީވާނާ ލޯބިން ވެއްޖޭ. . [5]

“އާމިނަތުއަކީ ބޭބެގެ ދަރިއެއްތަ. ” އަހަރެންނަށް ނުހުރެވިގެން އަހައިލެވުނެވެ. “މިހެން މިއެހީ ބޭބެމެން އެހާ އުމުރުން ދޮށީވެފަ އާމިނަތު އެހާ ޅަވީމަ. ” އަހަރެންގެ ވާހަކަ ތަކުން ބަކުރުބެއަށް އުނދަގޫތަކެއް ވިހެން ހީވިއެވެ. އެއާއިއެކު ޝާޔާގެ މޫނުމަތިން ފެންނަން ހުރި އުފާވެރިކަން ގެއްލިގެން ދިޔައެވެ. ޝާޔާ ވެސް އަވަހަށް ކާގެއިން ނިކުމެގެން ދިޔައީއެވެ. އަހަރެންނަށް އިނދެވުނީ އަހަރެންގެ އަނގަ ގަދަކަން ހިތަށްއަރާފައި ބުނާނެ އެއްޗެއް ނޭނގިފައެވެ.

“އާމިނަތު އަކީ ބޭބެ މެންގެ އުފަން ދަރިއެއްނޫން. އެއީ ބޭބެއާއި ރައްޓެހި ވަށަފަރު ރަޝީދުގެ ބޮޑުބޭބެ ކުއްޖެއް. އެ މަންޖެ ވިހެއުމާއިއެއްކޮށް މަންމަ ނިޔާވީ. މާގިނަ ދުވަހެއް ނުވެ ބައްޕަވެސް ނިޔާވީކަމަށް ވަނީ. އެންމެ ފަހުން ބަލަދު އެރީ ރަޝީދުއަށް. އެއީވެސް އެކަނި ހުރި މީހެއް.ރަޝީދަކީ ބޭބެއާއި ވަރަށް ގާތް މީހެއް. ހައްވަގެ އުމުރުން އޭރު ސާޅީސް އަހަރު ވެއްޖެ. ބޭބެމެންނަކަށް ދަރިއެއް ނުލިބޭ. އެހެންވެ އެދަރިފުޅު ބަލަން ރަޝީދު ބޭބެއާއި ޙަވާލުކުރީ. އޭރު ރަޝީދު ދޭތެރެ ދޭތެރެއިން އެއްޗިހި ފޮނުވާ އުޅޭނެ. ފަހަކުން އެއްޗެއްވެސް ނުފޮނުވާ. ” ޝާޔާއަކީ ޔަތީމު ކުއްޖެކެވެ. ޝާޔާގެ ޙާލަތު އެނގުމުން އަހަރެންގެ ހިތަށް ވަރަށް އަސަރު ކުރިއެވެ. ޝާޔާއަށް ބޭބެމެންފަދަ މާތް ބައެއްގެ އޯގާތެރިކަން ލިބުނީތީ އަހަރެން އުފާކުރީމެވެ. އަހަރެންގެ ހިތުގައި ބޭބެއަށް ވީ ޤަދަރު އުފުލިގެން ދިޔައެވެ.

“އެހެންވީމަ ބޭބެމެންގެ ހުންނަނީ އާމިނަތު އެކަނިދޯ. ؟” އަހަރެން ޔަޤީންކޮށްލުމަށް އަހައި ލީމެވެ.

“ނޫނޭ. ބޭބެމެން އާމިނަތު ބަލަން ފެށިތާ އަހަރެއް ނުވެ ހައްވާ އިނީ ބަލިވެ. ﷲގެ ކުޅަދުންވަންތަކަން ދެކިބަލަ. އެހާދުވަހުގެ ފަހުން ހައްވާއަށް ދަރިއަކު ދެއްވީ. ހަމަ ލޯބި އަންހެން ކުއްޖެއް. ” ބަކުރުބެގެ ލޮލުން އޭރު އުފާވެރިކަމުގެ ކަރުނަ ފެންނަން ހުއްޓެވެ. އަހަރެންގެ ޙާލަކީވެސް އެއީއެވެ.

“އެއީ ބަކުރުބެ މެންގެ ހެޔޮކަމުގެ ބަދަލުގައި ﷲ ދެއްވި ރަޙްމަތެއް. ” އަހަރެން ބަކުރުބެގެ ހެޔޮކަން ފާހަގަ ކުރީމެވެ. ބަކުރުބެއަކީ މާތް މީހެކެވެ. “ދެން ކޮބާ އެކުއްޖާ.؟” އަހަރެންގެ ހިތުގައި އެކުއްޖާއާއި ބައްދަލުކޮށްލުމުގެ ޝަޢުޤުވެރިކަން އުފެދުމުން އަހާލީމެވެ.

“މަރިޔަމް މިހާރު ކޯސް ކިޔަވަން ކުޅުދުއްފުއްޓަށް ފޮނުވާފަ ވާނީ. ވަރަށް މޮޅުވާނެ. މިރަށު މަދަރުސާއިންވެސް ވަރަށްމަތިން ފާސްވި. ” ބަކުރުބެ ފަޚުރުވެރިކަމާއެކު ދަރިފުޅުގެ މޮޅުވާހަކަ ކިޔައިދެމުން ދިޔައެވެ. އަހަރެންވެސް ބަކުރުބެގެ ވާހަކަތައް އަޑުއަހަމުން ދިޔައީމެވެ.

“އާމިނަތުވެސް ކިޔަވާ ނިމުނީތޯ. އާމިނަތު ކޯހެއް ނަހަދާތޯ. ” އަހަރެން ނަށް ޝާޔާ އާއި ބެހޭ އިތުރު މަޢޫލޫމާތެއް ލިބޭތޯ ސުވާލު ކުރީމެވެ. ނަމަވެސް އަހަރެންގެ ސުވާލުން ބަކުރުބެއާއި ހައްވާދައްތަގެ މޫނުމަތިން ހިނިތުން ފިލައިގެން ދިޔައެވެ.

“ކޮބާ ދުފަންވާނެއެއްނު. ” ހައްވާ ދައްތަ ތެދުވެގެން ދުފާތަބަށް ބަލާ ދިޔައެވެ. ހީވަނީ އިތުރަށް އެމަޢުޟޫއަށް ވާހަކަ ދައްކަން ބޭނުން ނުވަނީހެނެވެ.

“އާމިނަތު އަކީ ވަރަށް ނަސީބުދެރަ ކުއްޖެއް. ” ބަކުރުބެގެ ވާހަކައިން އަހަރެންގެ ހިތަށް ނުތަނަވަސް ކަން ވެރިވަމުން ދިޔައެވެ. ހިތުގެ ތެޅުން ބާރުވަމުން ދިޔައެވެ. “އެމަންޖެއަކަށް ވާހަކައެއް ނުދެއްކޭ . ” ބަކުރުބެގެ އެ ޖުމްލައިން އަހަރެންގެ ހިތް ތޮރުފައިލިއެވެ. އަހަރެންނަށް ކާގޭ ދޮރުން ބޭރުން ފެންނަން ހުރި ޝާޔާ އަށް ބަލައިލެވުނެވެ. ފެންޑާގައި އިސްދަށަށް ޖަހާލައިގެން އިން އެ މައުސޫމު މޫނުމަތިން އަހަރެންނަށް ފެންނަމުންދިޔައީ ހިތްދަތިކަމެވެ. އިސް އުފުލާ އަހަރެންނަށް ބަލައިލިއެވެ. ހިނިތުންވެލީ ގަދަކަމުންކަން އެނގުނެވެ. އަހަރެންގެ ލޮލަށް ކަރުނަ ޖަމާވާން ފެށުމުން އިސްދަށަށް ޖަހާލާ އިނގިލިތަކުގެ ނުފުށުން ކަރުނަތައް ފުހެލީމެވެ.

ސައި ބޮއި ނިމުމުން އަހަރެން ކާގެއިން ނިކުތީމެވެ. އޭރު ބަކުރުބެ ދުފަނީއެވެ.

“ބަކުރުބޭ. ދެން އަޅުގަނޑު ގޮސްލަނީއޭ. ” ބަކުރުބެގެ އިޒްނައާއިއެކު އަހަރެން ނިކުންނަން ދިޔައީމެވެ. ދިޔަމަގުމަތީގައި ފެންޑާގައި ތަނބެއްގައި އަތްއަޅުވާލައިގެން ހުރި ޝާޔާ އާއި ކައިރިވެލީމެވެ. އަހަރެން ޝާޔާއާއި ދިމާލަށް އަންނަން ފެށުމުން ޝާޔާ ކުޑަކޮށް ހާސްވެފައި ހުރިކަން އެނގުނެވެ. އަހަރެން ބޭނުންވީ މިއަދު ޝާޔާއާއި ވާހަކަދައްކާލާށެވެ.

“ހާއި. އައިމް ޝޯން. ނައިސްޓު މީޓްޔޫ. ” އަހަރެން ސަލާމްކޮށްލަން އަތް ދިއްކޮށްލީމެވެ. އިސްދަށަށް ޖަހައިގެން ހުރެ ޝާޔާ އަހަރެންނާއި ސަލާމްކޮށްލިއެވެ. ޝާޔާގެ އަތްތިލަ އަހަރެންގެ އަތްތިލާގައި މަސްހުނިވިވަގުތު އަހަރެންގެ ބޮލުން ފަޔަށް ކަރަންޓްގެ އޮއިވަރެއް ދަތުގުކޮށްލިއެވެ. އެފިނި އަތްތިލަ އަހަރެންގެ އަތުގެތެރޭގައި އަބަދަށް ބާއްވާލަން އަހަރެން ބޭނުންވިއެވެ.

އަހަރެންގެ ހިތުގައި ވީ ހުރިހާ އިޙްސާސްތަކެއް ބަންޑުންކޮށްލެވުނީ ހިތުގައި ކުޅެލެވުނު ފޮނި ރާގެއްގައެވެ.

ނޭދެން އުފާ އަދު، ޔާރުނޫން.

ފިނި ޝިފާއެއް، ޔާރު ނޫން.

ހިތްމިނޭދޭ ފުން އަރާމެއް، ލޯބި ނޫން. ލޯބިނޫން.

މޭގާވި ކުރެހިފަ ނަލަ ތިމޫން.

ޖާދޫވި ނަޒަރޭ ލޮލުގެތޫން.

ހިތްމިނޭދޭ މިންވަރެއްވެސް، ލޯބިނޫން. ލޯބިނޫން.

ބޭނުން މިހިތް ލޯބިން ނިކަން ޙާޞިލް ކުރަން ޔާރާ.

ބޭނުން މިހިތް ލޯބިން ނިކަން ޙާޞިލް ކުރަން ޔާރާ.

އަހަރެންގެ ހިތުގެ ޙާލު ޝާޔާއަށް އެނގޭނެނަމައެވެ. ޝާޔާ އިސްއުފުލާލާ އަހަރެންނަށް ބަލައިލިއެވެ. ޝާޔާގެ ޤުދުރަތީ ރީތިކަމާއި ލަދުރަކި މިޒާޖުގެ ސަބަބުން ޝާޔާއަކީ ދުނިޔޭގައި ހުރި އެންމެ ރީތިކުއްޖާއަށް ވާނެކަން ގައިމެވެ.

އެވަގުތު ޝާޔާގެ މޫނުމަތިން ފާޅުވި ދާތިކިތައް ފެނިފައި އަހަރެންނަށް ހަމަހޭވެރިކަން ވިއެވެ. އެއާކިއެކު އަހަރެން ޝާޔާގެ އަތުން ދޫކޮށްލީމެވެ. ޝާޔާގެ ހިތުގައި އޮތް އެއްޗެއް އަހަރެންނަށް އެނގުނީ ކިހިނެއް ހެއްޔެވެ؟

“ޔޫ ހެވް އަ ބިއުޓިފުލް ސްމައިލް. ” އަހަރެން މަޑުމަޑުން ޝާޔާއަށް ތަޢުރީފް ކޮށްލީމެވެ. އެއާއިއެކު ޝާޔާގެ ލަދުވެތި ކޯތާފަތް މަތީގައި ޖަންބުކުލައިގެ އޮއިވަރެއް ދުވެލިއެވެ. އެވަގުތު ޝާޔާގެ އިނގިލިތައް ހަރަކާތް ކުރަންފެށިއެވެ. ޝާޔާގެ ބަހުރުވައިން އަހަރެންނަށް ބުނަންއުޅޭއެޗެއް ބެލުމަށް އަހަރެންގެ ހުރިހާ ޝަޢުޤުވެރިކަމެއް ހުސްކޮށްލީމެވެ.

“ޔޫ. ޓޫ. ” ޝާޔާގެ އިޝާރާތުން އަހަރެންނަށް ބުނެލިއެވެ. އެފަދަ މައުސޫމް ކަމެއް އަހަރެން ދުވަހަކުވެސް ނުދެކެމެވެ. އެއާއިއެކު އަހަރެންގެ ތުންފަތާ ކުޅެވިގެންދިޔައީ ފޮނި ހިނިތުންވުމެކެވެ. ހިތަށް ބާޔާންކުރަން ނޭނގޭ ހަމަޖެހުމެއް ލިބުނެވެ. ވަގުތުން ޝާޔާ އަހަރެންގެ މޭގެ ތެރޭގައި ބޮނޑިކޮށްލަން ބޭނުންވިއެވެ. ނަމަވެސް އަހަރެންގެ އިޙްސާސްތަކުގެ މައްޗަށް ބާރުފޯރުވީމެވެ. ބަކުރުބެއާއި ހައްވާ ދައްތަ ތިބުމުންނެވެ. އަހަރެން ދެފިޔަވަޅެއް ފަހަތައް ޖެހިލާ ޝާޔާއަށް ބަލައިލީމެވެ. ޝާޔާގެ ރީތިކަމުން ބައެއް ފޮރުވިފައިވާހެން ހީވެގެންނެވެ. އެއަށްފަހު ކައިރިވެލާ ޝާޔާގެ އިސްތަށިކޮޅު ހައްޔަރުކޮށްފައިވާ ވޫލްކޮޅު ދަމައިގަތީމެވެ. އެއާއިއެކު ސިލްކްކޮޅެއްފަދަ އޮމާން އިސްތަށިގަނޑު އެއްވެސް ހިފެހެއްޓުމެއްނެތި ޝާޔާގެ ރީތިކަން ފުރިހަމަކޮށްދީފިއެވެ.

“އަޅެ ރީއްޗެއް ނޫންތަ މިހެން ހުންނައިރަކު. ” އަހަރެން އެނބުރިލާފައި ހައްވާ ދައްތައަށް ބުނެލީމެވެ. ހައްވާ ދައްތަވެސް ހިނިތުންވެފައި ބަލަން ހުރެ ބޯޖަހާލީއެވެ.

“އަދި އަހަރެންގެ މަރިޔަން މާ ރީތިވާނެ. ” ބަކުރުބެ ކާގެއިން ނިކުމެ ދޮރުލައްޕާލާފައި އަންނަމުން ބުނެލިއެވެ. އެއާއިއެކު ޝާޔާގެ މޫނުމަތީގައިވި ހިނިތުން ފިލައިގެން ދިޔައެވެ.

“ދެން އަޅުގަނޑު ގޮސްލަނީ. ” އަހަރެން އެހެން ބުނެފައި ޝާޔާއަށް އެނބުރުނީމެވެ.

“ފަތިސްގަޑީ އަހަރެން ޝާޔާގެ ލެޓަރއަށް އިންތިޒާރުކުރާނަން. ” އެހެން ބުނެފައި އަހަރެން ދާން ހިނގައިގަތީމެވެ. އަހަރެންގެ ޖީބުން ނަގައި ނޯޓެއް ދީފައެވެ. ޝާޔާގެ މޫނުމަތީގެ އުޖާލާކަން އިންތިހާއަށް ބަބުޅަމުން ދިޔައެވެ. އަހަރެންގެ ނޯޓްގައި އިނގިރޭސިން ލިޔެފައި ވާނެއެވެ.

“ދުނިޔޭގައި ހުރި އެންމެ ރީތި ކުއްޖާއަށް،

މަލާއެވެ. އަހަރެންނަށް ކަލާ އެންމެ ފުރަތަމަ ފެނުނީ އަހަރެންގެ ހުވަފެނުންނެވެ. އޭރު ކަލާތީ ކޮން ދުނިޔެއެއްގައި އުޅޭ ކޮންފަދަ ޙޫރަލްޢީނެއް ކަމެއް އަހަރެންނަކަށް ނޭނގެއެވެ. ނަމަވެސް އެހިނދުން ފެށިގެން އަހަރެންގެ މިހިތުގައި ރަނިކަން ކުރަމުން އައި ސޫރައަކީ ތިއީއެވެ. އަހަރެންގެ ހުވެފެންތަކުގެ ދިރުމަކީ ތިއީއެވެ. އަހަރެންގެ ހިތުގެ ޝެހެޒާދާ އަކީ ތިއީއެވެ.

އޭޕަރީއެވެ. އަހަރެން އެންމެ ފުރަތަމަ މިރަށަށް އައިދުވަހު ކަލާވަނީ އަހަރެންގެ ކުލަފަތި ހުވަފެނީ ޢާލަމްގައި ޙަޤީގީ ކުލަޖައްސަން ފަށާފައެވެ. ކަލާގެ ޖާދޫގައި މެނުވީ އަހަރެންގެ އުންމީދީ ގަނޑުވަރު ބިނާކޮށްދެވޭނެހާ ބާރެއް ނުވެއެވެ. ކަލާއީ އަހަރެންގެ ދިރިހުރުމުގެ މަޤްސަދުކަމުގައި ވެއްޖެއެވެ.

ކަނބާއެވެ. މިހިތުގެ ޙާލަކީ މިއީއެވެ. މިހިތުގެ ވިންދަކީ ތިއީއެވެ. އެދިހުރި ފަރުވާއަކީ ތިއީއެވެ. މިއިޙްސާސަށް ކިޔަންވީ ކީކޭތޯއެވެ. ކަލާގެ އަރިހުން ޖަވާބު ލިބުންއެދިވަމެވެ.

ކަލާގެ ޚިޔާލުގައި ދިވާނާވެފައިވާ. ޝޯން. ”

“އެކޮއެ. އަދި އަންނަންވާނެ އިނގޭ. ” އަހަރެން ދާންފެށުމުން ބަކުރުބެ ބުނެލިއެވެ. އަހަރެން ބޯޖަހާލާފައި ދިޔައީމެވެ. އަހަރެން ދިޔައީ ހިތުގެ އަޑިން ޢަޒުމްތަކެއް ކަނޑައަޅައިގެންނެވެ. ޝާޔާއަކީ ނުކުޅެދޭ ކުއްޖަކަށް ވެދާނެއެވެ. ނަމަވެސް އެ ނުކުޅެދުންތެރިކަން ޙައްލުކުރަން މަސައްކަތް ވެސް ކުރެވިދާނެއެވެ. އަހަރެން ކޮންމެފަދަ ޙާލެއްގައިވެސް ޝާޔާ ޙާޞިލް ކުރާނަމެވެ. މާތްރަސްކަލާނގެ އިރާދަފުޅުން ޝާޔާގެ ނުކުޅެދުންތެރިކަން ކުޅެދުންތެރިކަމަކަށް ބަދަލުކުރާނަމެވެ. ބަކުރުބެމެންނަކީ މާތް، ރަނގަޅުބައެކެވެ. އެހެންވީރު އަހަރެން ބަކުރުބެ މެންނަށް އެހީވެދޭނަމެވެ. އަހަރެން ހިތްހަމަޖެހިފައި ހުރެ އެނބުރި ގެޔަށް ދިޔައީމެވެ.

“މިއޮށް އަންނަނީނު. ކޮންތާކަށް ގޮސްފަ ތިއައީ. ސިއާންބެ ނުފެނިގެން އާންބެ އާއި ޒެންބެ ވަރަށް ހޯދައިފި. ” ރިޔާގެ ޖުމްލައާއިއެކު އަހަރެންނަށް އަނގަ ހުޅުވައިލެވުނީ ބުނިއެއްޗެއް ޔަޤީން ނުވެގެންނެވެ. “އާންބެ އާއި ޒެންބެ” އޭ ބުނިހެން ހީވެގެންނެވެ. މިވަނީ ކިހިނެއްބާއޭ އަހަރެންގެ ހިތަށްއެރިއެވެ. އޭރު ރިޔާ ހުރީ ގޭދޮރުމަތީގައެވެ. ގޭތެރޭގައި ވަރަށް އަޑުގަދަ ކޮށްލައިގެން އުޅެއެވެ. ބަލާބެލުމަށް ކޮންމެވެސް ކަންތައްގަނޑެއް ހިންގަނީއެވެ.

“ވަޓްސް ގޮއިން އޮން. ؟” އަހަރެން ވާނުވާ ނޭނގިފައި އަހާލީމެވެ. ރިޔާ ދޮރާށި ހުޅުވާލަމުން ކިޔައިދިނެވެ.

“މިއަދު މަންމަގެ ބާތްޑޭ. އެންޑް މޮމް އެން ޑޭޑްގެ އެނިވަރސަރީ. އެހެންވެ މިރެއަށް ސަޕްރައިޒް ޕާޓީއަކަން ތައްޔާރުވަނީ. އެކަކުވެސް އަދި ވިޝްނުކުރަން. ” ރިޔާ ދަތްޕިލަ އަތަށް ލާފައި ކަހަލަގޮތަކަށް ބުނެލިއެވެ. ގޭތެރެއަށް ވަތް އިރު މުޅި ގޯތީތެރެ ވަނީ އެކި ކުލަކުލައިގެ ޑެކެރޭޝަން ކުރަމުންދާ ދެޖިންސުގެ ކުޑަބޮޑު މީހުންނުން ފުރާލާފައެވެ. ޖަހާފައިވާ މިއުޒިކަކީ އަޔާންގެ ކަމެއްކަން ޔަޤީނެވެ. އެރީތި ޖޯޝުންފުރިގެންވާ މިއުޒިކާއި އެއްވަރަށް އެކި މަސައްކަތުގައި ހުރިހާއެންމެންވެސް ބިޒީ ވެފައި އުޅެއެވެ. އޭރު އަޔާން ދަމާފައިވާ ކަންވާރުތަކެއްގައި ކަފާފައިވާ އަކުރުތައް ތަތްކުރަން ހަރުގަނޑަކަށް އަރާ އޮތެވެ.

“ޑޫޑް. ޔޫ މިސްޑް ސޯމަޗް ފަން. ” ގޭތެރެއިން ކަފާފައިވާ ކުލަކަރުދާސް ތަކެއް ހިފައިގެން ނިކުތް ޒާހިންއަހަރެންނާ އަރާހަމަވުމުން ބުނެލާފައި ގޮސް ފާރުގައި ޑިޒައިން ތަކެއް ހަދަމުންދާ ދެތިން ކުއްޖަކާ އެއްބައި ވެލިއެވެ.

“ހޭ. ޔޫ ގައިސް ނަޓްސް. ” އަހަރެން ރަނާ ފެނުމުން ގޮސް ޝަކުވާ ކުރަންފެށީމެވެ. “މިހާ އަވަހަށް މި ހުރިހާ ތައްޔާރީތަކެއް ކޮށް ނިންމީމަ ކޮން ސަޕްރައިޒް ޕާޓީއެއް؟. ” މަންމަ އައީ ބަސްޓްވީ. ؟؟” ރަނާ ހަމަޖެހިފައި ހުރިވަރުން އަހަރެން އިތުރަށް ވާނުވާ ނޭނގިގެން އެހީމެވެ.

“ބްރޯ. ހަމަޖެހިލާ. މީހަމަ ސަޕްރައިޒް ޕާޓީއެކޭ. ” ރަނާ އަހަރެންގެ ކޮނޑުގައި ޖަހާލާފައި ރަނާގެ ކަންތަކާއިގެން ކުރިއަށް ދިޔައެވެ. އެތާނގައި ވާނުވާ ނޭނގޭ މީހަކަށް ހުރީ އަހަރެން އެކަނި ކަހަލައެވެ.

“ރަނާ ކޮއްކޯ. ބޭބެއަށް ގެނެސްދީބަލަ އެތަނުން ޑަބަލްޓޭޕްކޮޅެއް. ” ހަރުގަނޑު މަތީގައި ހުރި އަޔާން ރަނާއަށް ލޮލުގެ ހިމަކޮޅުން ބަލާލަމުން ބުނެލިއެވެ. ހައިރާންވެ އަންތަރީސް ވެއްޖެއެވެ. ކުއްލިއަކަށް ބޭބެ ކޮށްކޮވެގެން މިއުޅެންފެށީ ކިހިނެއްވީބާއޭ އަހަރެންގެ ހިތަށް އެރިއެވެ. އޭރު ރަނާ ރަކި ހިނިތުންވުމަކާއިއެކު ގޮސް “އާންބެ” އަށް ޓޭޕް ކަފައިދެނީއެވެ.

“ސޯ. ވަޓް އެމް އައި ސަޕޯސްޓު ޑޫ. ؟” އަހަރެން ވެސް ކޮންމެވެސް ކަމެއް ކުރަން ޖެހޭނެތާއެވެ.

“ޖަސްޓް ސިޓް އެން ވޮޗް. ” އަޔާން މާ ކަންތައް ކުރެވޭ މީހަކަށް ވެލާފައި ބުނެލިއެވެ.

“އަމް. ސިއާންބެ އެނތެރޭގަ ތިބި ކުދިންނާއި އެއްކޮށް ކާޑްތައް ކަފާލަދީ ހަދާލަންދޭ. ” ރިޔާ ހުދު ފޮތިގަނޑެއްގެ އެއްކޮޅުގައި ހިފައިގެންހުރެ އެތަން މިތަން ހޯދލާފައި އަހަރެންނަށްވެސް ޑިއުޓީއެއް ހަމަޖައްސައިފިއެވެ.

“ގްރޭޓް. ” އެނތެރޭގައި ހުރި ބިއްލޫރި މޭޒުމަތީގައި ޕްރިންޓްތައް ހިފައިގެން ތިބި ބާރަ ތޭރަ އަހަރަށްދާ ދެއަންހެން ކުދިން ފެނިފައި ބުނެވުނެވެ. އެކުދިން ހީނ ހީނފައި އަހަރެންނާއި ދިމާލަށް ބަލަމުން ސިއްރު ސިއްރުން ތުންތަޅުވަނީއެވެ. ދެފުށުއެޅިފައި އިރުކޮޅަކު ހުރުމަށްފަހު އަހަރެން ގޮސް މަތިންބައިން އަނގަތަޅާގަނެފައި އެކުދިންނާއި އެއްކޮށް އެކަމުގެ ތެރެއަށް ބޭނިގަތީމެވެ.

އިރުއޮއްސި ހަތެއްޖަހައިފިއެވެ. އޭރުވެސް ބަދިގެ ތެރޭގައި ކައްކަން އުޅޭ ކުދިން އެކަމުގައި އަވަދިނެތި އުޅެއެވެ. އަހަރެން ބަދިގެ ފަރާތައް ދިޔައީ ހާފިޒް އާއި ޝިޔާމް އާއި އެކު ބޮކިފަތި ހަރުކުރަން އުޅެފައި ފެންފޮދެއް ބޯލާށެވެ. އަސްކަނީގައި ހުރި ކުޑަ ފާރުބުރިމަތީ އިށީނދެލައިގެން އިން ރަނާ ފެނިފައި އަހަރެން އަނެއްކާވެސް އަހައިލީމެވެ.

“އައިޝާދައްތަ ނާންނާނެތަ މިކަމުގަ ތިއްބަ؟ އައިސްފިއްޔާ މުޅިން ފަނިވީނު. ” ރަނާގެ މޫނުމަތިން ކުރިއެކޭވެސް އެއްގޮތަށް ފެނުނީ ހަމަޖެހޭކަމެވެ.

“ތިކަމާ ހާސްނުވޭ. ބައްޕައަށް އޮތީ ތިކަން ހަވާލުކޮށްފަ. ބައްޕަ އައީވެސް މިކަމަށް ތައްޔާރުވެ ހުރިހާ އެއްޗެއްވެސް ހިފައިގެން. ބައްޕަ ވަރަށް އެކްސްޕާޓް ވާނެ މަންމަ ސްޓޯލް ކުރަން. ” މުޙައްމަދުބެ އެ ނުފެންނަނީ އެހެންވެތާއޭ ހިތަށް އެރިއެވެ. އަހަރެންވެސް ފެންފޮދެއް ބޯލައިގެން އަވަހަށް ދިޔައީ ދެންތިބި ކުދިންނާއިއެކު ގޯތިތެރޭގައި މޭޒުތައް އެތުރުމާއި މޭޒުތަކުގައި ފޮތިއަޅާ ރީތިކުރުމުގެ ކަންތައް ކުރުމަށެވެ. ގާތްގަނޑަކަށް ހުރިހާ ކަމެއްވެސް ވަނީ ވަރަށް ފުރިހަމައަށް ތައްޔާރުވެފައެވެ. އެކިކުލަކުލައިން ނިވިދިއްލޭ ބޮކި ތަކާއި ކުލަކަރުދާސް އަދި ކުލަ ބޮކި ތަކުން ޖާދުވީ ރީތިކަމެއް އެ މާޙައުލަށް ގެނުވާފައި ވެއެވެ. ޑެކެރޭޝަން ތަކުގެ ފުރިހަމަކަމުން ކަޅި ހުއްޓިފައި ތިބޭނީ ކިތައް މީހުންބާއޭ ހިތަށް އަރަމުން ދިޔައެވެ. ނުވައެއް ޖަހަންވާއިރަށް ދަޢުވަތު ދިން މީހުން އަންނާނެއެވެ. އެހާ އިރަށް ރަނގަޅަށްވެސް ނިމޭނެއެވެ.

ގަޑިން ނުވައެއް ޖެހީއެވެ. ޒީނަތްތެރި ކޮށްފައިވާގެ އެއްކޮށް ކުނިކަހާ މޭޒުތައްމަތީގައި އެއްޗިހިއަތުރާ ހުރިހާކަމެއް ވަނީ ނިމިފައެވެ. މެދުގައި ހުރި މޭޒުމަތީގައި ހުރި ތިންބުރިއަށް ހަދާފައިވާ ރީތި ކޭކްގެ މަތީގައި ހެޕީ ބާރތްޑޭ މޮމް އެން ހެޕީ އެނިވަރސަރީ ޖަހާފައިވެއެވެ. ނޫކުލައާއި ރަތް އަދި ހުދުކުލައިން ޑެކެރޭޓްކޮށްފައި ވާއިރު ވަރަށް ފުރިހަމައެވެ. ހުރިހާއެންމެން އަތުރާލެވިފައިވާ ގޮނޑިތަކުގައި އިށީނދެގެން މިހާރު އެތިބީ އައިޝާދައްތަ އަންނާނެ އިރެއްގެ އިންތިޒާރުގައެވެ. އަހަރެންނާއި އަޔާން އަދި ޒާނިޝްވެސް ތައްޔާރު ވެލައިގެން ނިކުމެ ރަނާ އާއި ރިޔާއާއިއެކު ތިބީމެވެ. ކުޑައިރުކޮޅެއްގެ ތެރޭގައި އައިޝާދައްތަ ގޮވައިގެން މުޙައްމަދުބެ އަނަނާނެއެވެ. އެހާއިރަށް މިއުޒިކްވެސް ވަނީ ހުއްޓާލާފައެވެ. ހުރިހާކަމެއް ވަނީ ވަރަށް ފުރިހަމައަށް ނިމިފައެވެ. އަހަރެންވެސް ބައިވެރިވެގެން ޑެކެރޭޓްކުރި ޕާޓީއެއް މިހާ ފުރިހަމަ ވީމައި އަހަރެންވެސް ހުރީ ވަރށް އުފާވެފައެވެ. އެކިގޮތްގޮތަށް އެ މާޙައުލު ފޮޓޯނެގުނީ ކިހާވަރަކަށް ކަމެއް ނޭނގެއެވެ.

އެންމެންގެ ލޯވަނީ ވަންނަ ދޮރާއިދިމާލަށް ހުއްޓިފައެވެ. އަޔާން ޖެހިގެންހުރި ރަނާގެ އަތުގައި މަޑުމަޑުން ހިފައިލީ އެހެން މީހަކަށް ނޭނގޭހާ ވެސް ސިއްރުންނެވެ. ރަނާއަށް ހުރެވުނީ އަޔާންގެ އެސަމާސާއަށް ހިތް ދޫކޮށްލައިގެންނެވެ. އޭރު ރަނާގެ މޫނުމަތިން ހިނިތުންވުން ފިލައިގެން ނުދެއެވެ. އިރު އިރުކޮޅާ ދެމީހުން އެކަކު އަނެކަކަށް ބަލައިލައެވެ. ރިޔާއާއި ޒާނިޝްގެ ޙާލަކީވެސް އެއީއެވެ. ކައިރީގައި ތިބެވުމުން ލޮލުގެ ކުދި އިޝާރާތްތަކާ ކުދިކުދި ގޯނާތަކުން އެތާނގައިވެސް ސިއްރު ސިއްރުން އުފާހޯދަނީއެވެ. އެދެޖޯޑުމެދުގައި އެހުރިހާ މަންޒަރެއް ބަލަން އަހަރެން ހުރިއިރު ހިތުގައި ޙަސަދަވެރިކަމެއް ނުއުފެދި ހުންނާނެހެއްޔެވެ؟ ޝާޔާމަތިން އަހަރެންނަށް ހަނދާންވާވަރުން އުނދަގޫވެފައި ހުރީމެވެ. ކެއްތެރިކަން ކުޑަވެފައި ހުރެވެނީ ފަތިސްވާނެ އިރަކަށެވެ.

ކުއްލިޔަކަށް ދޮރު ހުޅުވާލުމާއިއެކު ހުރިހާއެންމެން އެއްކޮށްކަހަލަ ގޮތަކަށް ކޮޅަށް ތެދުވިއެވެ. “. ސަޕްރައިޒް. !!!!!. ” ގެ އަޑު މުޅި ހިސާބުގައި ގުގުމައިގެންދިޔައިރު އަނގަމަތީ އަތް އަޅައިގެން ބުނާނެއެއްޗެއް ނޭނގިފައި ކަހަލަގޮތަކަށް ހުރެގެން އައިޝާދައްތަ އެތެރެއަށް ވަންނަނީއެވެ. ފަހަތުން އައި މުޙައްމަދުބެވެސް ހުރީ ތައްޔާރުކޮށްފައިވާލެއް ފުރިހަމަކަން ފެނިފައި ހައިރާންވެފައިކަން މޫނުމަތިން ފެންނަން ހުއްޓެވެ. އެއާއިއެކު މަޑުމައިތިރި ހިތްގައިމު މިއުޒިކުން ޙަފްލާފެށިގެން ދިޔައެވެ.

-ނުނިމޭ-